Azərbaycanın aparıcı İKT şirkəti Azerconnect Group MDB regionunda ilk dəfə süni intellekt əsaslı yeni nəsil radio şəbəkələrinin inkişafı üzrə alyansa – AI RAN Alyansına qoşulub. NVIDIA, Nokia, Samsung və digər nəhəng şirkətlərin də üzv olduğu qlobal platforma mobil şəbəkə infrastrukturunun süni intellekt texnologiyaları əsasında təkmilləşdirərək daha ağıllı, çevik və səmərəli şəbəkə arxitekturalarının formalaşdırılmasını həyata keçirir.

Alyansa qoşulmaqla Azerconnect Group süni intellekt əsaslı mobil şəbəkə sahəsində qlobal və qabaqcıl texnologiyalara çıxış imkanlarını daha da genişləndirəcək. NVIDIA-nın GPU (Qrafik Prosessor Modulu) əsaslı radio emalı və süni intellekt dəstəkli RAN alqoritmləri kimi innovativ həllərin tətbiqi şəbəkə dayanıqlılığının və spektr səmərəliliyinin artırılmasına töhfə verəcək. Həmçinin GPU əsaslı radio şəbəkələr üzərində müxtəlif süni intellekt tətbiqlərinin rahat istifadəsini təmin edəcək. Eyni zamanda, ağıllı enerji optimallaşdırma həllərinin tətbiqi şəbəkə əməliyyatlarında daha yüksək səmərəliliyin təmin olunmasına və şirkətin dayanıqlılıq hədəflərinin dəstəklənməsinə xidmət edəcək. Azerconnect Group-un AI-RAN Alyansına üzvlüyü  6G texnologiyalarına hazırlıq strategiyasında mühüm mərhələnin başlanğıcıdır.

Qeyd edək ki, AI-RAN Alyansına üzvlük İKT sahəsində yerli mütəxəssislərin innovativ texnologiyalardan yararlanma imkanlarını daha da artıracaq. Platforma çərçivəsində Azerconnect Group əməkdaşları beynəlxalq ekspertlərdən ibarət işçi qrupları ilə birbaşa əməkdaşlıq edəcək, həmçinin müxtəlif texniki sessiya və təcrübə mübadiləsi platformalarında aktiv iştirak edəcəklər.

AI-RAN Alyansı haqqında

AI-RAN Alyansı telekommunikasiya sənayesində Radio Giriş Şəbəkələrinə (RAN) süni intellekt texnologiyalarının inteqrasiyasını sürətləndirmək məqsədilə yaradılmış qlobal əməkdaşlıq platformasıdır. 2024-cü ildə təsis olunan alyans telekommunikasiya ekosisteminin aparıcı iştirakçılarını bir araya gətirərək innovasiyaların təşviqinə, qabaqcıl təcrübələrin formalaşdırılmasına və RAN infrastrukturlarının məhsuldarlığını, əməliyyat səmərəliliyini və çevikliyini artıran yeni nəsil süni intellekt həllərinin inkişafına töhfə verir.

Azerconnect Group haqqında

Ölkəmizdə dinamik şəkildə inkişaf edən İKT və yüksək texnologiyalar sahələrində fəaliyyət göstərən Azerconnect Group mobil, internet, beynəlxalq kanalların təşkili və FinTech, AdTech, Media/TV kimi rəqəmsal xidmətlər təqdim edir. Azerconnect Group müxtəlif ölkələrdə və sahələrdə fəaliyyət göstərən NEQSOL Holding beynəlxalq şirkətlər qrupunun tərkibinə daxildir.

Azərbaycanın İKT şirkəti Azerconnect Group və ABŞ-nin texnologiya şirkəti NVIDIA arasında GeForce NOW tərəfdaşlıq müqaviləsi imzalayıb. Müqavilə Azerconnect Group-un baş direktoru Emil Məsimov və NVIDIA-nın baş vitse-prezidenti Cef Fişer tərəfindən ABŞ-nin San-Xose şəhərində keçirilən görüşdə imzalanıb.

“NVIDIA ilə tərəfdaşlıq çərçivəsində GeForce NOW platformasını Azərbaycana gətirməkdən məmnunuq. Bu addım Azerconnect Group-un ağıllı rəqəmsal xidmətlər portfelini genişləndirmək öhdəliyinə sadiqliyini göstərir”, - deyə Azerconnect Group-un baş direktoru Emil Məsimov bildirib.

NVIDIA-nın bulud üzərindən oyun texnologiyası olan GeForce NOW güclü RTX qrafik prosessorları vasitəsilə müxtəlif cihazlarda 120 FPS ( saniyədə 120 kadradək) və 4K keyfiyyətində oyun təcrübəsi təqdim edir. Xidmət hazırda 2,000-dən çox oyunu dəstəkləyir  və bir platformada Game Pass oyunları da daxil olmaqla Epic Games, Steam, Ubisoft və Xbox kimi oyun kitabxanalarına qoşulma imkanı verir. GeForce NOW xidməti sayəsində Azərbaycanda minimal gecikmə ilə bulud oyun təcrübəsi təqdim ediləcək və bu da oyunçulara ən son oyunları texniki göstəriciləri yüksək olmayan cihazlarda belə oynamağa imkan verəcək. 

“Azerconnect Group-un GeForce NOW tərəfdaşlığı vasitəsilə Azərbaycanda bulud üzərindən oyun xidmətlərinə çıxışın genişləndirilməsinə dair addımların yüksək dəyərləndiririk. Tərəfdaşlıq nəticəsində Azerconnect Group NVIDIA RTX texnologiyası ilə dəstəklənən son nəsil oyun təcrübəsini daha geniş auditoriyaya təqdim edəcək”, - deyə NVIDIA-nın telekommunikasiya sahəsində biznesin inkişafı üzrə qlobal vitse-prezidenti Kris Penrouz qeyd edib. 

ABŞ-yə səfər çərçivəsində Azerconnect Group-un baş direktoru Emil Məsimov və şirkət nümayəndələri, həmçinin Kris Penrouzun rəhbərlik etdiyi NVIDIA komandası ilə görüş keçirib. Görüşdə ağıllı şəbəkə, süni intellekt fabriki və süni intellekt əsaslı 6G infrastrukturu sahələrində imkanların gücləndirilməsi müzakirə edilib, Azərbaycanın texnoloji inkişafının növbəti mərhələsi üçün əməkdaşlıq sahələri nəzərdən keçirilib.
 

“Azerconnect Group”un baş direktoru Emil Məsimov Mentorluq Proqramı çərçivəsində beşinci “Yüksəliş” müsabiqəsinin qalibi Məmməd Həsənovla görüşüb.

Emil Məsimov qalibi müsabiqədə əldə etdiyi önəmli nailiyyət münasibətilə təbrik edib, “Yüksəliş” müsabiqəsinin ölkəmizdə kadr potensialının gücləndirilməsi, istedadların üzə çıxarılmasında rolunu vurğulayıb. Görüş zamanı baş direktor mentinin peşəkar inkişafının dəstəklənməsi məqsədilə biznes və idarəetmə sahələrində təcrübəsini bölüşüb. Eyni zamanda, qaliblə karyera planlaması, gələcək inkişaf prioritetləri, eləcə də idarəetmə və liderlik bacarıqlarının daha da təkmilləşdirilməsi mövzularında müzakirələr aparılıb. 

“Yüksəliş” müsabiqəsi haqqında

“Yüksəliş” müsabiqəsi Azərbaycan Respublikasının Prezidenti cənab İlham Əliyevin 26 iyul 2019-cu il tarixində imzaladığı Sərəncamla təsis olunub. Müsabiqə qalibləri mentorlar tərəfindən birillik fərdi inkişaf planı və özünüinkişaf üçün 20 min manat məbləğində pul mükafatı əldə edirlər.

Sayca altıncı “Yüksəliş” müsabiqəsinin keçirilməsi ilə bağlı Azərbaycan Respublikasının Prezidenti cənab İlham Əliyev tərəfindən 10 dekabr 2025-ci il tarixində müvafiq Sərəncam imzalanıb.

“Azerconnect Group” haqqında

Ölkəmizdə dinamik şəkildə inkişaf edən İKT və yüksək texnologiyalar sahələrində fəaliyyət göstərən “Azerconnect Group” mobil, internet, beynəlxalq kanalların təşkili və FinTech, AdTech, Media/TV kimi rəqəmsal xidmətlər təqdim edir. “Azerconnect Group” müxtəlif ölkələrdə enerji, telekommunikasiya, yüksək texnologiyalar və tikinti sahələrində fəaliyyət göstərən “NEQSOL Holding” beynəlxalq şirkətlər qrupunun tərkibinə daxildir.